ANXO MANUEL RODRÍGUEZ RATEL, 2º PREMIO POESíA 2008 UNIVERSIDADE DE VIGO
Dende a nosa biblioteca queremos darlle a máis sincera noraboa o noso bo compañeiro. Asiduo da biblioteca e colaborador da mesma, Anxo Manuel Rodríguez Ratel, de 23 anos, veciño de Baiona e estudante de cuarto curso de Filoloxía Galega , foi premiado co segundo premio de poesía 2008 da Universidade de Vigo. O seu poemario “Tempo de Andrómedas” será publicado pola editorial Xerais.
As nosas felicitacións e o noso apoio na nova andadura literaria para o noso amigo Anxo.
Aquí temos unha pequena mostra da súa obra poética:
Buscareite no rebumbio do teu alborecer
nunha gándara cinguida de soños
ancorados no futuro.
Rendereime a ti en miríficos novilunios
cando caian maduras as noites
da árbore do silencio.
Serei o meu único aliado tinguido de cinsa
amorgallado á vontade da ciobra
torcaza que circunda.
Unha doce ecolalia
e o desconcerto nas mantas frías
-----xxxx----
O meu teléfono móbil vestiuse de crepúsculo
naquela tarde dos biluricos na que tornaches xigante
sempre fuches de frondosa beleza
-febrícula- rosmaba eu
de que valeu?
de súpeto caeron tesas todas as bolboretas do mundo
o teu sorriso aurífero foi un augadoiro panexírico
os aloumiños profesaron unha estulticia disecada
Pensei: nin solpor
nin lingua
nin praia
nin seos
e fiquei mudo
Acaroouse covarde o estrepitoso tempo das andrómenas
Xa non faremos máis barricadas na memoria
Antón dijo
Estou moi contento de que alguén da nosa comarca reciba un premio de poesía pola universidade.As miñas felicitacións a Anxo e animalo a seguir escribindo e plasmando na poesía toda a sabiduría e o bo facer que tén.
Grazas por dar a coñecer un pouco máis a poesía.
20 Mayo 2008 | 12:26 PM